Организацијата за безбедност и соработка во Европа (ОБСЕ) ги повика денеска и двете страни во украинскиот конфликт целосно да го почитуваат договорот од Минск за прекин на огнот, јави ТАСС.
– Во овој момент е важно сите воени дејствија да бидат неодложно прекинати и Специјалната мониторинг мисија на ОБСЕ да добие целосен пристап до сите области на Украина, во и околу Дебалцево, апелираше актуелниот претседавач на организацијата со седиште во Виена, српскиот министер за надворешни работи Ивица Дачиќ.
Тој изрази загриженост во врска со извештајот на Специјалната мисија дека не и било дозволено да го посети реонот на источниот украински град, преземен вчера од проруските сепаратисти, и покрај тоа што договорот за прекин на огнот стапи во сила од саботата на полноќ.