Американскиот претседател Барак Обама вети денеска дека САД ќе ја продолжат борбата против џихадистите од Исламска држава откако првите американски воздушни удари погодија цели на милитантите во Сирија.
Тој исто така вети дека ќе настојува да добие што е можно поширока меѓународна поддршка за таа борба.
– Секој кој има намера да им наштети на САД или на Американците мора да им биде јасно дека нема да толерираме прибежишта за терористи, кои му се закануваат на нашиот народ, наведе Обама во Белата куќа пред заминувањето за Њујорк.
Тој додаде дека силата на коалицијата во која се повеќе од 40 држави покажува дека борбата против екстремистите не е само американска.
– Америка е горда што стои рамо до рамо со сите тие држави во име на нашата заедничка безбедност, истакна Обама.