Американскиот претседател Барак Обама ќе ја претстави вечерва стратегијата за „ослабнување и во краен случај уништување“ на терористичката организација „Исламска држава“, која дејствува во Ирак и во Сирија, изјави портпаролот на Белата куќа, Џош Ернест.
Тој истакна дека Обама е уверен оти спротивставувањето на исламистичките борци е прашање од првостепена важност за националната безбедност на САД.
Претседателот ќе ги изнесе плановите во телевизиско обраќање кон нацијата, кое ќе го направи од Белата куќа во 21 часот според времето во Вашингтон.
Се очекува планот да содржи масовни контратерористички акции за уништување на џихадистичката групација, кои ќе бидат надвор од рамки на сегашната ограничена мисија, чија цел е преку воздушни напади да се заштитат американските интереси во Ирак и да се олесни хуманитарната криза.
Обама ќе го повтори и повикот кон Конгресот на САД да го одобри планот во вредност од 50 милиони долари за вооружување и обучување на сириските бунтовници.