Ввладите на Ирска и Норвешка денеска ќе ја соопштат својата одлука за признавање на палестинската држава, пишуваат медиумите во тие земји. Даблин минатата недела сигнализираше дека „сигурно“ ќе признае палестинска држава пред крајот на мај, а Осло навести слична иницијатива пролетта.
Лидерите на двете земји, вклучително и нивните премиери Сајмон Харис и Јонас Гахра Сторе, претпладнево треба да одржат прес-конференции во Ирска и Норвешка. Во оваа прилика Ирска и Норвешка мора да ја соопштат својата одлука за ова, објавија ирските медиуми RTE и Irish Times и норвешките медиуми NRK и Aftenposten.
Израелското Министерство за надворешни работи објави видео порака до Даблин на социјалната мрежа Х за да предупреди на фактот дека „признавањето на палестинската држава ризикува да ве трансформира во пион во рацете на Иран и палестинското исламистичко движење Хамас“.
Оваа мерка „само ќе го поттикне екстремизмот и нестабилноста“, според израелската дипломатија. Шпанскиот премиер Педро Санчез минатата недела најави дека денеска ќе го објави датумот кога Мадрид ќе ја признае палестинската држава.
Во март, Санчез објави заедничка изјава во Брисел со шефовите на владите на Ирска, Словенија и Малта, во која четирите земји изразија желба да признаат таква држава. Тој, исто така, ги посети Норвешка и Ирска во април, а трите земји рекоа дека се подготвени да ја признаат палестинската држава „во тесна координација“, според норвешкиот премиер Сторе.
За Израел, овие планови претставуваат „награда за тероризмот“ што би го направило решението со преговори за војната во Појасот Газа помалку веројатно. Повеќето од 193 земји-членки на ОН – 142, според палестинските власти – досега признале палестинска држава.
Израел вети дека ќе го уништи Хамас и започна голема офанзива против Појасот Газа како одмазда за нападот на 7 октомври, во кој загинаа повеќе од 1.170 луѓе, од кои повеќето цивили. Од 252 лица кои беа земени како заложници за време на нападот, 124 се уште се држат во Газа, вклучувајќи 37 мртви, според израелската војска.
Од 7 октомври досега 35.647 Палестинци, од кои повеќето цивили, се убиени во Појасот Газа во израелските бомбардирања и воени операции, соопшти Министерството за здравство на Хамас, кое владее со Газа.