Реакцијата на францускиот претседател Емануел Макрон на неодамнешните напади на американскиот претседател Доналд Трамп укажува на растечкото европско незадоволство околу неговиот однос со Иран, пишува „Њујорк тајмс“.
Макрон, кој се смета за еден од европските лидери со најтактичен пристап кон Трамп и неговиот непредвидлив стил, овој пат јавно покажа „впечатлив израз на незадоволство“. Според авторот на текстот, оваа реакција го одразува сè поизразениот пркос на европските држави, кои досега се обидуваа да одржат рамнотежа помеѓу резервите во врска со воените потези и избегнувањето на директен конфликт со Вашингтон.
На актуелниот спор му се дава дополнителна тежина фактот што, како што се нагласува, тој доби и лична димензија. Сопругата на францускиот претседател, Брижит Макрон, исто така беше во центарот на контроверзноста откако Трамп на шега тврдеше дека таа „го удрила во вилицата“, додавајќи дека сè уште се опоравува од тоа.
Макрон остро ги критикуваше ваквите изјави, опишувајќи ги како нечувствителни и несоодветни за меѓудржавна комуникација на највисоко ниво.
Во исто време, францускиот претседател ги повика таканаречените средни сили да се обединат и да заземат понезависен став во глобалните односи, нагласувајќи дека Европа не смее да биде во подредена положба.
„Нашата цел не е да бидеме вазали на две хегемонистички сили“, рече Макрон.