Русија веројатно ќе го отфрли новиот план за прекин на огнот од 19 точки, изготвен од САД и Украина. Но, може да користи дезинформации за да го држи претседателот на САД, Доналд Трамп, вклучен во разговорите, сугерирајќи дека војната ќе трае барем до Божиќ, дознава „Њујорк пост“ од извори запознаени со ситуацијата.
Белата куќа претходно соопшти дека работи на постигнување договор откако специјалниот претседателски претставник Стив Виткоф разви претходна верзија на планот од 28 точки што ја фаворизираше Москва.
Тој почетен план, критикуван од двете страни на американскиот политички спектар и меѓународната заедница како едностран, подоцна беше намален на 19 точки прифатливи за Украина по разговорите меѓу високи претставници од Вашингтон и Киев во неделата.
Изворите изјавија за „Њујорк пост“ дека Русија нема да се согласи ниту со оваа верзија, бидејќи претходниот поширок план не ја задоволи целосно Москва.
Рускиот министер за надворешни работи, Сергеј Лавров, изјави претходно денес дека Москва нема да поддржи никаков план што отстапува од верзијата од 28 точки на Трамп.
Лавров го спореди најновиот план со разговорите меѓу Трамп и Путин на самитот во Анкориџ во август, сугерирајќи дека Кремљ од таа средба добил впечаток дека Трамп застанал на страната на Москва.
Кремљ го пофали оригиналниот план како реалистичен пат кон мир, истакнувајќи дека секој предлог што отстапува од него нема да ја има поддршката на Москва.
Оригиналниот план, кој беше протечен минатата недела, предизвика бура од реакции и го принуди американскиот државен секретар Марк Рубио да го ревидира предлогот.
Новиот предлог од 19 точки значително се разликува од оригиналниот, отстранувајќи ги ограничувањата за украинските воени сили и оставајќи ја отворена можноста за приклучување кон НАТО.
Прегледот на планот беше финализиран по состанокот на Рубио со украинските преговарачи во Женева, а државниот секретар го опиша како најпродуктивен досега, пренесува Танјуг. Украина се согласи со условите на мировниот договор порано денес по состанокот со американските претставници во Абу Даби.