Израелскиот премиер Бенјамин Нетанијаху во интервју за Би-Би-Си побара да не им се испорачува оружје на сириските бунтовници, нагласувајќи дека неговата земја ќе го искористи правото да ги блокира испораките „поради ризик оружјето да стигне до рацете на терористи“.
– Вооружувањето на бунтовниците го поставува прашањето кои се бунтовниците и какво е оружјето. Ситуацијата е сложена.
Ние сме загрижени дека оружјето, кое би ја изменило рамнотежата на силите на Блискиот Исток, би можело да стигне во рацете на овие терористи, изјави Нетанијаху, потенцирајќи ја инфилтрираноста на џихадистичките групи и Ал Каеда во редовите на бунтовниците.
Тој ја спомена и либанската група Хезболах, која го поддржува режимот во Дамаск против бунтовниците.
– Главна закана е оружјето кое веќе се наоѓа во Сирија. Станува збор за противвоздушно, хемиско и друго многу опасно оружје, кое би можело да го смени односот на силите, истакна израелскиот премиер.
Британскиот министер за надворешни работи Вилијам Хејг вчера изјави дека Велика Британија и Франција ќе продолжат да работат за укинување на ембаргото на ЕУ за вооружување на бунтовниците во Сирија.