Рускиот опозициски лидер Алексеј Навални изјави денеска дека неговата победа која ја остварил со пресудата од Европскиот суд за човекови права, е историска и важна за останатите политички активисти во Русија, кои се соочиле со прогон од државата.
Судот во Стразбур денеска донесе пресуда дека апсењата на Навални биле политички мотивирани. Најпознатиот политички противник на рускиот претседател Владимир Путин помина над 140 денови зад решетки во изминатата една и пол година.
Судот, исто така, издаде наредба Русија да му исплати отштета од 63.000 евра на Навални.
Обраќајќи се пред новинарите, Навални истакна дека денешната пресуда претставува пример за „изворна правда“ и е важен сигнал за многу луѓе во Русија кои се соочуваат со селективни апсења поради своите политички активности.