Сојузниците на НАТО лоцирани долж источната граница на Алијансата се се позагрижени поради присуството на војници на платеничката група Вагнер во Белорусија.
Вагнер е таму од неуспешниот бунт против Русија во јуни.
Полска, Литванија и Летонија, членки на НАТО и на Европската унија кои граничат со Белорусија, веќе се во состојба на готовност откако голем број мигранти и бегалци почнаа да пристигнуваат на нивните граници од Белорусија пред две години.
Тие го обвинија белорускиот лидер Александар Лукашенко за отворање на мигрантската рута, нарекувајќи го чинот „хибридна војна“ чија цел е дестабилизација на Западот.
Сега, загриженоста дополнително се зголеми откако војниците на Вагнер почнаа да пристигнуваат во Белорусија по нивниот краток бунт во Русија.
Полскиот премиер Матеуш Моравјецки во текот на викендот изјави дека околу 100 ловци на Вагнер во Белорусија се приближиле до границата со Полска.
„Сега ситуацијата станува уште поопасна. Ова секако е понатамошен чекор во хибридниот напад на полска територија. Вчерашниот инцидент дополнително ја зголеми загриженоста, кога два белоруски хеликоптери влегоа во полскиот воздушен простор на мала височина за време на вежбите“, рече Моравјецки.
Полското Министерство за одбрана го пријави инцидентот до НАТО, кој денеска соопшти дека ја следи ситуацијата.
„НАТО внимателно ја следи ситуацијата долж своите источни граници, вклучително и вчерашниот инцидент кога два белоруски воени хеликоптери накратко преминаа во полскиот воздушен простор на мала надморска височина“, изјави официјален претставник на НАТО под вообичаениот услов да остане анонимен.