НАТО, во обид да го зголеми производството на оружје, почна да споделува доверливи проценки со своите одбранбени индустрии членки кои одредуваат какви видови оружје и опрема треба да произведуваат земјите од Алијансата, објави денеска Блумберг, повикувајќи се на добро информирани извори.
Овој потег е дел од напорите на НАТО да го поттикне зголеменото производство на оружје како дел од она што генералниот секретар на Алијансата Марк Руте го нарече „смест кон воениот начин на размислување“, извести агенцијата.
Како што наведоа неименувани извори, НАТО се обидува да им обезбеди на компаниите во секторот за производство на оружје информации за потенцијалните цели со цел да ги убеди да го зголемат производството.
За таков чекор би бил потребен консензус меѓу сојузниците, а тоа би можело да се случи во следните неколку месеци, рече еден извор.
Според Блумберг, овој потег е поттикнат и од враќањето на американскиот претседател Доналд Трамп во Белата куќа.
Тој претходно се закани дека ќе ја задржи воената поддршка од членките на НАТО кои трошат помалку за одбрана.
Во посебна процедура, Алијансата веќе го започна процесот на споделување голем број доверливи стандарди и воени критериуми со земјите од ЕУ, од кои само девет не се членки на НАТО, велат изворите.
Овие воени критериуми имаат за цел да ги усогласат вооружените сили на членките на Алијансата со цел да се постигне нивната интероперабилност, како што се, на пример, калибри на оружје или заедничка воена терминологија.
Неименуван претставник на НАТО рече дека Алијансата ги презела овие чекори, во кои е вклучена и ЕУ, како дел од нејзините нови одбранбени планови.