Генералниот секретар на НАТО, Јенс Столтенберг денеска изјави дека Русија испраќа голем број свои војници во Украина и руската страна на границата со таа земја и ја повика официјална Москва да ги повлече своите војници.
– Освен војниците, Русија на тие подрачја испраќа и софистицирана воена опрема, вклучувајќи и системи за воздушна одбрана, рече Столтенберг пред денешниот состанок на министрите за одбрана на земјите-членки на Европска унија во Брисел.
– Станува збор за многу важно распоредување на воените сили и опрема и ние ја повикуваме Русија да ги повлече своите сили и да придонесе за имплементација на мировниот договор со Украина, изјави првиот човек на Северноатлантската алијанса, мислејќи на договорот за прекин на огнот, кој на 5 септември во Минск го договорија претставниците на Русија, Украина и проруските сили во источниот дел на Украина.
Столтенберг додаде дека Москва би можела да биде дел од мирното решение за конфликот во источниот дел на Украина, а во спротивно може да продолжи да оди по патот на изолација.