Министрите за одбрана на државите членки на НАТО, се согласија како одговор на украинската криза да ги зајакнат одбранбените капацитети на источните граници.
Од друга страна, пак нападите и гранатирањата во Украина продолжуваат, а бројот на жртви се зголемува од ден на ден.
-Ќе ги зајакнеме воздушните и поморски патроли од Балтичкото до Црно море. Правиме акционен план за долгорочно кревање на капацитетите, преку зајакнати вежби и разузнавачки активности -изјави генералниот секретар Андрес Фог Расмунсен, по првиот ден од министерскиот совет во Брисел.
Тој им се заблагодари на САД за финансиската помош, која што претседателот Обама им ја вети на членките на НАТО, за зајакнување на борбената готовност.
Инаку на состанокот е постигнат и договор, НАТО да и помогне на Украина да ги реформира и унапреди своите одбранбени сили.
Според најновите информации припадници на украинските сили на пункт во Красан Лиман, гранатирале железничари од Славјанск кои тргнале на работа, при што еден од нив е убиен, а друг повреден.
Украинската авијација ги бомбардирала болницата и централниот водовод во Славјанск, поради што дотурот на вода е во прекин. Како што соопштија украинските сили во последните напади загинале двајца, а се повредени 42 војници.
Е. Г.