Канадската полиција соопшти дека напаѓачот од средата во главниот град Отава, Мајкл Зехаф-Бибо, дејствувал сам и очигледно немал врски со извршителот на понеделничкиот напад во провинцијата Квебек, Мартен Руло.
Зехаф-Бибо, кој уби војник кај воениот меморијален споменик, а потоа го нападна Парламентот, каде беше застрелан, бил канадски државјанин, но можно е да имал и либиско државјанство, изјави полицијата.
Руло, кој со својот автомобил удри во двајца војници, од кои едниот почина, исто така беше застрелан.
– Немаме информация за врска меѓу двата напада од оваа недела, изјави началникот на полицијата Боб Полсон.
Според полицијата, Зехаф-Бибо имал намера да замине за Сирија и за таа цел сакал да му биде издаден пасош. Пред неколку години тој преминал во ислам и се залагал за радикални идеи, а канадските власти му го одзеле пасошот за да не може да патува во странство и да и се приклучи на некоја терористичка организација.
Полицијата соопшти дека и покрај претходно појавените информации, Зехаф-Бибо не бил вклучен на безбедносниот список со 90-тина набљудувани потенцијално опасни лица од страна на властите, кои можат да заминат во странство за да се приклучат кон терористички организации.