Египетските безбедносни власти соопштија дека најмалку 18 полицајци се убиени во напад врз конвој возила на Синајскиот Полуостров.
Нападот го потврди и претставник на Министерството за внатрешни работи во Каиро, но одби да изнесе детали за бројот на убиените и ранетите.
Одговорноста на овој најнов напад презеде џихадистичката група Исламска држава (ИД).
Нападот се случил кај градот Ел Ариш во северен Синај, во близина на границата со Газа, кога од експлозија на бомба поставена во автомобил биле уништени три оклопни возила и едно возило за сигнална опрема.
Колоната застанала за момент поради едно возило препречено на патот, но откако полицајците го тргнале тоа експлодирало. Веднаш потоа, група џихадисти отвориле оган врз ранетите и преживеаните полицајци.
Припадниците на силите за безбедност возвратиле, но нема сознанија за жртви кај напаѓачите.
Конвојот со полицајци се движел од градот Кантара кон Ел Ариш.
Нападот доаѓа само кусо време по операцијата на египетските безбедносни сили во два стана во Каиро, кога беа убиени десетмина припадници на милитантните исламистички групи.
Неколку стотици полицајци и војници се убиени досега во терористичките напади на џихадистите, кои главно операираат на Синајскиот Полуостров, од јули 2013 година, кога беше сменет од власт исламскистичкиот претседател Мохамед Морси.
Освен кон припадниците на војската и полицијата, исламистичките терористи во овој период, имаат извршено и повеќе напади врз заедницата на египетските христијански Копти.