Владата на Самоа прогласи состојба на катастрофа откако циклонот Еван опустоши на Јужен Пацифик, уништи згради и предизвика големи поплави.
Полицијата во Самоа соопшти дека најверојатно во налетот на циклонот неколку деца се удавиле. Засега официјалниот број на жртви е две лица.
Еван предизвика лизгање на земјиште и материјална штета, а прекинато е и напојувањето со електрична енергија.
Властите тврдат дека тоа било најлошо невреме што го погодило тој регион во изминатите неколку години. Властите стравуваат дека циклонот може да добие на интензитет – до петта категорија и да ги погоди Фиџи.
– Целата држава е без струја. Целосно се уништени постројки на електро-дистрибуцијата и можеби нема да имаме струја во следните две недели, соопштија од Бирото за управување во време на катастрофи. Циклонот Еван се очекува да ги погоди Фиџи в недела.