Египетскиот претседател Мохамед Морси одлучи да не учествува на лидерската средба на муслиманските земји во развој, која започнува денеска во Исламабад, за да може да ја следи ситуацијата во Појасот Газа, каде синоќа стапи во сила примирје.
На пакистанската средба на врвот ќе учествуваат шефови на држави и влади од групата Д-8 (Developing Eight), формирана во 1997 година. Морси во Исламабад ќе го испрати својот потпретседател Махмуд Мекки, соопшти претседателскиот кабинет.
– Морси донесе ваква одлука поради потребата да ги следи настаните и дејствијата на сите страни, кои се опфатени во договорот за прекин на огнот во Газа, се наведува во соопштението на кабинетот.
Примирјето, кое стави крај на еднонеделните судири меѓу Израел и палестинското радикално движење Хамас, беше објавено вчера во Каиро по интензивни посреднички напори од страна на Египет.
Израелските власти соопштија дека 12 ракети биле истрелани од Газа веднаш по почетокот на примирјето. Советот за безбедност на ОН ги повика и Израел и Хамас да го почитуваат прекинот на огнот.