Францускиот весник „Монд“ денеска објави дека силите на сирискиот режим повеќепати употребиле хемиско оружје против бунтовниците во реонот на Дамаск.
– Хемиски напад во Џобар, на влезот на сирискиот главен град. Во почетокот тоа не изгледа како ништо спектакуларно. Кога борците на Слободната сириска армија стигнаа најблиску до Дамаск, сфатија дека се изложени на хемиски напад од владините сили, но веќе било предоцна. Каков и да користат гас, тој веќе ги дава своите ефекти, на само неколкустотина метри од домовите во главниот град, пишува весникот „Монд“ во репортажа објавена на сајтот на весникот.
На почетокот изгледа како паднато шишенце „Пепси“. Нема ниту мирис, ниту чад, ниту звук што кажува дека испушта отровен гас. Потоа се јавуваат симптомите. Луѓето суво кашлаат. Пржење на очите, зениците се намалуваат и видот се замаглува. Наскоро доаѓаат дишни проблеми, повраќање и губење свест. Најтешко погодените војници треба да бидат евакуирани, пред да се задушат, се наведува во репортажата.
Силите на режимот првиот напад со хемиско оружје во Дамаск го извршиле на 11 април, тврди „Монд“.
Еден од фото-репортерите на весникот имал замаглување на видот и проблеми со дишењето во траење на четири дена по нападите на 13 април. Репортер и фотограф на „Монд“, што минал два месци прикриен со бунтовниците во и околу Дамаск, раскажува дека бил сведок на напади со хемиско оружје.
Режимот и бунтовниците меѓусебно се обвинуваат за употреба на хемиско оружје. Инспектори од ОН веќе неколку недели се подготвени за проверка на терен на овие тврдења, но дипломатските спорови и загриженоста за безбедност го одложува нивното заминување за Сирија.