Д-р Коми Вјас, која работеше во болница во Удаипур, даде отказ од работа за да се пресели во Лондон и да му се придружи на својот сопруг, д-р Пратик Џоши, со нивните три деца.
Телефон што му припаѓаше на ова семејство од Раџастан беше пронајден во остатоците од ужасната авионска несреќа во Ахмедабад. Телефонот можеби не е во функција, но селфито од авионот ќе живее како потсетник на трагедијата што ги снајде 242-цата патници на летот на Ер Индија.
Фотографијата означуваше нов почеток за семејството – д-р Џоши и неговата сопруга, со три деца – синови близнаци и постара ќерка. Момчињата се трудат најдобро што можат да се насмевнат пред камерата, додека постарата сестра сјае.
Луѓе блиски до семејството рекоа дека овие двајца лекари работеле во болницата Пацифик во Удајпур.
Д-р Џоши се преселил во Лондон пред некое време и се вратил во Раџастан претходно оваа недела за да го земе своето семејство со себе. Близнаците Накул и Прадјут имале пет години, а нивната сестра Мираја имала осум.
„Коми неодамна дала отказ од работа за да му се придружи на својот сопруг во Лондон“, изјави портпаролот на болницата во Удајпур.
Соседите рекоа дека таткото е добро познат радиолог во градот.
„Вчера заминаа за Ахмедабад за да летаат за Лондон. Пратик дојде тука само пред два дена за да ги земе сопругата и децата со себе. Неколку други членови на двете семејства отидоа да ги испратат“, изјави нивен роднина за NDTV.
Ер Индија 171, лет за Лондон што ги носеше лекарскиот пар и нивните деца, полета од аеродромот Ахмедабад во четврток и беше во воздух само 32 секунди пред да започне со спуштањето.
Експлодираше во 13:38 часот по локално време. Во него имало 242 лица – 230 патници, 10 членови на екипажот и двајца пилоти.