Мал авион со два мотора, во кој се наоѓал и директорот на италијанската модна куќа „Мисони“ Виторио Мисони, исчезна вчера во близина на венецуелските острови Лос Рокес.
Мисони, неговата сопруга и уште четири лица се наоѓале во авионот. Меѓу исчезнатите се уште двајца Италијанци и двајца членови на екипажот, државјани на Венецуела.
Мисони (58) е син на основачот на брендот „Мисони“ и косопственик на фирмата заедно со неговите браќа и сестри.
Тој се враќал од божиќниот и новогодишниот одмор, кој ги поминал со сопругата Мауриција Кастиљони и со двајцата пријатели Елдо Скалвенци и Гвидо Форести.
Семејството на Мисони денеска потврди дека авионот исчезнал. Веднаш е започната потрага по исчезнатиот авион.
Авионот полетал од аеродромот во туристичкото место Лос Рокес и требал да слета на меѓународниот аеродром во Каракас.
Архипелагот Лос Рокес, кој го сочинуваат неколку десетина острови на околу 150 километри од брегот на Венецуела, е еден од најпопуларните туристички дестинации.