Германската канцеларка Ангела Меркел изјави дека по околу 3.000 ирачки мигранти се враќаат во своите држави од Германија секој месец и тој број расте.
– Сега по околу 3.000 луѓе се враќаат во Ирак секој месец по ослободувањето на нивните градови од Исламска држава и таа цифра расте, изјави Меркел на митинг во провинцијата Баден-Вуртемберг, една од трите каде в недела ќе се одржат регионални избори.
Меркел е соочена со проверка на популарсноста во изборите, први по бегалската криза од минатото лето. Таа додаде дека е важно да се обезбеди стабилност и да се стави крај на војната во Сирија и во Ирак.
Германската канцеларка веќе наведе дека бројот на мигрантите ќе се намали.
– Нема да остане тука секој бегалец, нагласи таа. Според неа, мировните преговори за Сирија се важни за да се врати надеж за враќање на луѓето во својата татковина.