Германската канцеларка Ангела Меркел денеска изјави дека не се планираат натамошни економски санкции кон Русија поради Украина, изразувајќи притоа неадоволство од непочитувањето на прекинот на огнот во источна Украина.
– Не сме задоволни со спроведувањето на договорот од Минск, бидејќи големи делови од него не се применуваат, изјави Меркел и додаде дека се занемаруваат прекинот на огнот и почитувањето на украинските граници.
Таа најави дека за овие теми ќе разговара со украинскиот претседател Петро Порошенко и со рускиот претседател Владимир Путин.
Меркел, исто така, информира дека списокот на луѓе на кои им е забрането патување во ЕУ ќе биде проширен со новоизбраните претставници на сепаратистите во источна Украина.
– Во моментов не се планираат понатамошни економски санкции. Во моментов сме фокусирани на зимата и хуманитарната ситуација и како да постигнеме прекин на огнот, изјави Меркел.