Германската канцеларка Ангела Меркел и високи функционери на Европската унија допатуваа денеска во градот Газиантеп во близина на границата на Турција со Сирија во обидот да дадат поттик за примена на спогодбата меѓу ЕУ и Анкара за решавање на бегалската криза.
Турскиот премиер Ахмет Давутоглу ги пречека Меркел, претседателот на Советот на ЕУ Доналд Туск и потпретседателот на Европската комисија, Франс Тимерманс на аеродромот во Газиантеп.
Безбедноста е на високо ниво, а делегацијата ја напушти пистата со двајца стрелци, кои стоеа на покривот на возилото.
Како што е планирано делегацијата оттаму ќе замине во бегалскиот камп во Низипу, во близина на границата со Сирија, каде како што се очекува ќе разговараат со некои од петте илјади бегалци.
Предвидено е делегацијата да го посети и детскиот центар, кој ја финансира ЕУ, во кој сириските деца можат да си играат и да добијат психолошка поддршка.