Во пресрет на моментот кога ќе стане премиер со најдолг континуиран мандат во историјата на Италија, Џорџа Мелони даде интервју за „Њујорк тајмс“ во кое се осврна на својот политички пат.
За време на разговорот, воден на италијански јазик во просторија до нејзината канцеларија во Рим, Мелони на моменти делуваше смирено, а на моменти борбено, истовремено духовито и одлучно.
Во еден момент таа се пошегува дека требало да заврши во театар.
„Требаше да се занимавам со театар. Замислете колку повеќе ќе се забавував! Не знам како завршив овде, но ете, се случи“, рече таа.
Италија, осмата по големина економија во светот, долго време мораше да се справува со перцепцијата дека е најслаба меѓу големите сили. Мелони е решена да го промени тоа.
„Не ми се допаѓа идејата за покорна Италија, Италија што се смета себеси за помала од другите“, рече таа.
Нејзината цел е да ја постигне „најголемата револуција што може да се случи во оваа нација – револуција на гордоста“.
„Не сакам кога другите ми кажуваат кои се моите граници. Зборот ’не‘ е една од работите што најмногу ме мотивираат“, истакна таа.
Она што важи за неа, според неа, важи и за нејзината нација – термин што таа секогаш го користи за Италија, наместо „Република“ или „држава“.
„Мислам дека храброста да се застане на ’непријатната‘ страна на историјата, да се одлучи да се оди спротивно на струјата, ме доведе овде“, додаде таа.
Со оглед на амбициите што ги има за својата земја, не беше изненадувачки што неодамна ја налути изјавата на американскиот претседател Доналд Трамп дека таа „молела“ да се фотографира со него на самитот на Г7 во Франција во јуни.
„Очигледно, верував дека работите ќе бидат полесни со Доналд Трамп, со оглед на нашите поклопени ставови за миграцијата и таканаречената ’воук‘ (woke) култура. Излезе поинаку“, призна Мелони.
Во јуни, таа беше првата од неколкуте навредени европски лидери што возвратија на Трамп, велејќи му: „Италија и јас никогаш не молиме“.