Русија и Украина ќе прогласат прекин на огнот долж целата линија на фронтот на Велигден, кој оваа година се паѓа на 20 април и според јулијанскиот и според грегоријанскиот календар.
Во исто време, Украина мора да ги повлече трупите од рускиот регион Курск, а потоа на крајот на април треба да се одржи меѓународна мировна конференција за официјализирање на договорот меѓу Русија и Украина со посредство на САД, Кина, европските земји и земји на глобалниот југ (Африка, Латинска Америка и Карибите, како и Азија без Јапонија, Јужна Кореја и Океанија без Австралија и Нов Зеланд).
Тогаш Украина и Русија ќе разменуваат затвореници по принципот „сите за сите“.
Порталот „Страна“, проруска веб-страница од Украина, објави дека вака во груб преглед изгледа планот што го подготви тимот на американскиот претседател Доналд Трамп, кој најави крај на руско-украинската војна за сто дена, додавајќи дека гореспоменатиот нацрт активно се дискутира во политичките и дипломатските кругови во Украина во последните денови.
Предметниот план Американците им го предале на европските дипломати, а од нив стигнал и до Украина, но не се открива како и на кој начин го добила редакцијата.
Иако сè уште нема потврда дека документот е автентичен, редакцијата „Страна“ наведе дека некои точки од планот се совпаѓаат со изјавите на самиот Трамп и неговиот специјален пратеник за Украина, Кит Келог.