Израелските сили денес убија најмалку 40 Палестинци, од кои половина во близина на место за дистрибуција на помош управувано од Фондацијата за хуманитарна помош во Газа (GHF), поддржана од САД, соопшти палестинското Министерство за здравство во окупираната енклава.
Претставници на Обединетите нации ги осудија методите на Израел за доставување помош преку GHF, објави Ројтерс. Медицински извори изјавија дека најмалку 20 лица се убиени, а 200 ранети во близина на место за дистрибуција на помош на GHF во Рафа.
Пукањето е последното во низата дневни пукања во кои загинаа стотици Палестинци кои се обидуваа да пристапат до залихи со храна по делумното укинување на речиси тримесечната израелска блокада.
Израел ја предаде одговорноста за дистрибуција на поголемиот дел од својата помош во Појасот Газа на Фондацијата за хуманитарна помош во Газа, поддржана од САД, која има места за дистрибуција на три локации во окупираната палестинска енклава.
Обединетите нации го отфрлија овој начин на дистрибуција на помош до ранливото палестинско население во Појасот Газа, наведувајќи дека дистрибуцијата преку GHF е несоодветна, опасна и ги крши принципите на хуманитарна непристрасност.
Израелската војска не коментираше веднаш за извештаите за пукањата во понеделник.