Поканата до либанскиот премиер Саад Харири е да ја посети Франција, а не понуда за политички егзил, рече францускиот претседател Емануел Макрон.
Тој смета дека Либан ќе биде стабилна држава и дека политичките избори ќе бидат во согласност со институционалното владеење.
– Ни треба силен Либан, чиј територијален интегритет ќе се почитува. Ни требаат лидери кои се слободни да прават свои избори и слободно да зборуваат, посочи Макрон.
Премиерот на Либан Харири пред 11 дена си поднесе оставка од својата функција преку видео порака емитувана од Саудиска Арабија, каде што тој и остана.
Тоа беше причина за многумина да веруваат дека оставката била изнудена од страна на саудиската страна и дека тој се држи во куќен притвор, па либанскиот претседател Мишел Аун не ја прифати неговата оставка.
Во интервју дадено после поднесувањето на оставката, Харири изјави дека е слободен и дека наскоро ќе се врати во Либан.