На иницијатива на францускиот претседател Емануел Макрон, денеска во Париз се одржува самит на европските лидери на кој ќе се разговара за идниот формат на безбедносни гаранции за Украина, како и за координација за актуелните теми кои се разгледуваат паралелно во преговорите предводени од САД – вклучително и контроверзното руско барање за ублажување на постоечките санкции.
Зборувајќи заедно со украинскиот претседател Володимир Зеленски, Макрон рече: „Русија нема право да поставува услови за помошта што и ја даваме на Украина, ниту ќе ги има“. Тој ја обвини Москва дека прави сè подолг список на барања.
Макрон, исто така, отфрли секаква идеја за укинување на санкциите, велејќи дека „се уште е многу рано за таква одлука“. „На крајот на краиштата, санкциите зависат исклучиво од одлуката на Русија да продолжи со својата агресија – а нивното укинување зависи исклучиво од одлуката на Русија да го почитува меѓународното право“, рече тој.
Кремљ вчера постави услов за почеток на прекин на огнот во Црното Море, барајќи укинување на некои западни санкции, особено оние поврзани со исклучувањето на Русија од системот SWIFT.
САД денеска не учествуваат во разговорите. Специјалниот пратеник на Трамп Стив Виткоф минатата недела го омаловажи француско-британскиот предлог, нарекувајќи го „комбинација на позирање, држење и поедноставување“.
Состанокот во Елисејската палата е во тек. Се очекува да трае три часа, а потоа се најавени прес конференции.