Дроновите што го нарушуваат воздушниот простор на земјите од Европската Унија и НАТО можат да бидат уништени, изјави францускиот претседател Емануел Макрон, повикувајќи на уште поголема стратешка неизвесност во европскиот одговор на ваквите инциденти.
– Верувам дека главниот одговор треба да биде уште поголема непредвидливост и стратешка неизвесност, рече Макрон на отворањето на самитот на Европската политичка заедница во Копенхаген.
Како што рече францускиот лидер, многу е важно да се испрати јасен сигнал.
„Нарушувањето на нашиот простор со дронови носи голем ризик. Тие можат да бидат уништени, точка. И ние нема да предупредуваме за тоа однапред“, рече тој.
„Ќе направиме сè што е потребно за да го зачуваме нашиот интегритет“, рече Макрон.
Русија е обвинета за повеќекратни нарушувања на воздушниот простор со авиони и дронови во последните недели.