Претседателот на Белорусија, Александар Лукашенко, за руски „Спутник“ изјави дека неговото заразување со Ковид-19 не е случајно.
Тој за медиумот изјави дека болеста му била подметната.
„Ми го подметнаа коронавирусот, сега тоа го истражуваме“, рече претседателот.
Лукашенко, исто така, додаде дека болеста ја прележал на нозе и во полесна форма.
„Можат да ме убијат, но никаде нема да избегаат“, додаде тој.
Лукашенко кон крајот на минатиот месец пред јавноста кажа дека имал коронавирус без симптоми и дека веќе оздравел.
– Денеска, се среќавате со човекот што успеа на нозе да го преживее коронавирусот. Лекарите тоа вчера го заклучија. Асимптоматски – рекол Лукашенко за време на посетата на белоруската војска минатиот месец.
Шеесет и петгодишниот лидер не сакаше да воведе рестриктивни мерки или да ги затвори границите за да го сузбие ширењето на коронавирусот.
Претходно, тој ги отфрли стравовите поради пандемијата како психоза и предложи вотка и бања во сауна за борба против вирусот.