Русија и Украина се во ќор-сокак на воените фронтови и двете страни треба да седнат на преговарачка маса и да се договорат за крај на конфликтот, изјави викендов белорускиот претседател Александар Лукашенко, сојузник на рускиот претседател Владимир Путин.
„Има доволно проблеми на двете страни и, општо земено, имаме сериозен ќор-сокак: никој не може да направи ништо и значително да ја зајакне својата позиција. Тие се соочуваат еден со друг во рововите, до смрт. Луѓето умираат“, рече Лукашенко.
Руските сили не се откажуваат од нападот на уништениот град Авдивка во Донецк и покрај големите загуби, соопшти Белата куќа, но линијата на фронтот во Украина речиси и не се помести во изминатата година, и покрај макотрпната повеќемесечна офанзива на Киев.
Лукашенко повторува дека барањата на Украина кон Русија, да ја напушти нејзината територија, мора да се решат на преговарачка маса, „за да не умира повеќе“. Според него, предусловите не се неопходни, главната работа е да се издаде наредба за прекин на борбите.
Украинскиот претседател Володимир Зеленски во саботата повтори дека неговиот план од десет точки, кој вклучува враќање на територијалниот интегритет на Украина, е единствениот начин да се запре војната предизвикана од руската инвазија во февруари 2022 година.
Мировниот план на Зеленски бара Русија да ги повлече сите свои сили надвор од меѓународно признатата граница на Украина. Но, Русија, која во септември 2022 година најави анексија на четири украински региони, Луганск, Донецк, Херсон и Запорожжја и Крим во 2014 година, отфрла секое решение кое би вклучувало напуштање на територијата.