Лука Дончиќ е последниот во низата големи спортски ѕвезди чија куќа е ограбена, потврдуваат од полицијата во Далас.
Според информациите на менаџерот на Дончиќ, упадот во домот на ѕвездата на Далас се случил во петокот вечерта.
– Во тој момент никој не беше дома и за среќа, Лука и неговото семејство се безбедни – изјави за ЕСПН Лара Бет Сегер, бизнис менаџер на Дончиќ.
Според полицискиот извештај прегледан од Dallas Morning News, украден е накит од околу 30.000 долари. Во полицискиот извештај стои и дека некој скршил прозорец во главната бања на куќата на Дончиќ, а упадот се случил во периодот од 17 до 21 часот.
Во ноември, НБА издаде предупредување до играчите, препорачувајќи за зголемена домашна безбедност, откако беа ограбени домовите на Боби Портис од Милвоки Бакс и Мајк Конли Јуниор од Минесота.
Лигата ги извести тимовите и играчите дека ФБИ ги поврза неодамнешните големи грабежи, во кои беа вклучени ѕвездите на НФЛ Патрик Махомес, Тревис Келче и Џо Бароу, со „транснационални јужноамерикански криминални групи“.
Според извештаите на Асошиетед прес, ФБИ предупреди дека овие групи се „добро организирани, софистицирани банди кои користат напредни техники и технологии, вклучувајќи беспилотни летала и уреди за блокирање на сигнали“.