Лидерката на AfD, Алис Вајдел, предизвика реакции вечерва откако во пренос во живо на ZDF изјави дека „Левица“ е партија што сака да „пука во богатите“.
Иако изјавата звучеше шокантно, Вајдел се повика на настан од 2020 година, кога на партиска конференција навистина беше изречена слична реченица.
Водителката на ZDF, Шакунтала Банерџи, најави проверка на фактите по изјавата на Вајдел.
Спорната реченица потекнува од стратешката конференција на „Левица“ во Касел во 2020 година.
Тогаш, една членка на берлинскиот огранок на партијата се вклучи од публиката во панел-дискусијата за енергетската политика.
„Енергетската транзиција ќе биде потребна и по револуцијата. Дури и кога ќе пукаме во еден процент од богатите, сепак ќе мора да се грееме“, рече таа.
Бернд Риксингер, тогашниот копретседател на „Левица“, реагираше со зборовите:
„И јас сакав да кажам: нема да пукаме во нив, туку ќе ги испратиме да прават нешто корисно.“
Неговата реакција предизвика дополнителни критики.
Жената што ја изрече спорната реченица, чие целосно име не беше објавено, неколку дена подоцна се извини во интервју за германската новинска агенција dpa.
„Тоа е целосно спротивно на моите политички ставови. Се гнасам од насилство врз луѓе“, рече таа, додавајќи дека била возбудена и зборувала непромислено.