Пограничната служба на Летонија спречи влез на 101 мигрант од Белорусија во изминатите 24 часа, објавија денеска локалните медиуми.
– Почнувајќи од 10 август, запревме 645 лица илегално да ја преминат границата, соопшти граничната служба.
Министерката за внатрешни работи на Летонија, Марија Голубева изјави дека ситуацијата на границата е тензична.
– Бројот на луѓе кои се обидоа илегално да влезат во земјата се зголеми. Имаше 68 во средата, а до утрово беа 101. Граничната служба и армијата продолжуваат да ја штитат државната граница, напиша Голубева на Твитер.
Освен Летонија, и Литванија забележа обиди за нелегални упади на нејзина територија.
Владата во Летонија воведе вонредна состојба на границата од 11 август и ќе трае до 10 ноември, со цел да и даде време на граничната служба да ги врати мигрантите назад во Белорусија.
Властите, исто така, одлучија да ја забрзаат изградбата на жичана ограда со Белорусија, која започна пред неколку години, а вкупната цена на градежните работи изнесува 30 милиони евра.