Француската крајнодесничарска партија Национален собир (RN) денес одржа митинг во градот Нарбон по повод Меѓународниот ден на трудот, каде поранешната лидерка на партијата, Марин Ле Пен, ги повика своите поддржувачи да се спротивстават на узурпацијата на демократијата.
„Први мај оваа година претставува голема мобилизација на народот“, рече Ле Пен, која на 30 април беше осудена на четири години затвор за проневера на јавни средства, а исто така доби забрана за вршење јавна функција во период од пет години, објави француската телевизија Bfmtv.
Ле Пен, која рече дека ќе поднесе жалба на пресудата, вети дека нејзината партија ќе ја обнови земјата каква што сака и ги повика поддржувачите да се мобилизираат за локалните избори во март следната година.
Таа додаде дека има намера да се бори за својата чест и да ја докаже својата невиност за да може да се кандидира на следните претседателски избори за две години.
„Ќе се борам за правда со сета моја енергија, која знаете дека ја имам, ќе се борам за тоа со ваша поддршка и од претседателот на партијата, Џордан Бардела“, им рече Ле Пен на собраните поддржувачи.
Таа се осврна и на економската состојба, која, како што рече, е причина за голема загриженост. Ле Пен истакна дека плановите за отпуштања се натрупале во последните недели.
„На Франција ѝ се заканува социјално крвопролевање. Ние сме во состојба на индустриска депопулација“, предупреди политичарката.
Претседателот на РН, Џордан Бардела, во својот говор рече дека Франција е земја која работи и никогаш не се жали.
„Имаме држава која е сè поагресивна и ги штити луѓето сè помалку и помалку“, рече тој.
Бардела пред неколку дена изјави дека ќе се кандидира за претседател на Франција во 2027 година, доколку на Марин Ле Пен ѝ биде забрането учество на изборите.