Лавров: Русија се истиснува од Нафтената индустрија на Србија и од светските енергетски пазари

Од:

Рускиот министер за надворешни работи Сергеј Лавров изјави дека Русија постепено се истиснува од Нафтената индустрија на Србија (НИС), но и од енергетските пазари ширум светот. За ова зборуваше во интервју за руската новинска агенција ТАСС и телевизиската куќа ВГТРК.

„Американците гордо објавија дека венецуелската нафта сега е под нивна контрола, а не под контрола на Кина и Русија, иако ние таму немавме контрола, туку бевме партнери. Не истиснуваат од таму, нè истиснуваат од сите енергетски пазари“, предупреди Лавров.

Според него, САД спроведуваат политика чија цел е да воспостават доминација на глобалниот енергетски пазар. Како еден од примерите ги посочи промените во сопственичката структура на Нафтената индустрија на Србија, во која руски „Газпром њефт“ е главен акционер.

„Усвоена е доктрина за доминација на глобалниот енергетски пазар, која сега се спроведува во практика. Нафтената индустрија на Србија, во која „Газпром њефт“ е главен акционер, минува низ процес на реструктурирање. И оттаму нè истиснуваат“, изјави шефот на руската дипломатија.

НИС повеќе од една година е под американски санкции поради мнозинската руска сопственост. Оттогаш Вашингтон секој месец ѝ ја продолжува лиценцата за продолжување на работењето, но и рокот за завршување на преговорите меѓу унгарскиот МОЛ и рускиот сопственик на НИС.

На 30 октомври НИС објави дека американската Канцеларија за контрола на странски средства (ОФАК) ѝ ја продолжила оперативната лиценца до 11 декември.

Во изминатите недели се појавија повеќе различни информации за наводниот исход од преговорите за продажба на НИС.

Списанието „Форбс“ на 1 октомври објави дека преговорите практично пропаднале, но од МОЛ набрзо ги демантираа овие информации во изјава за Би-Би-Си.

На почетокот на октомври и поранешниот српски претседател Александар Вучиќ соопшти дека во САД „истовремено размислуваат дали е подобро да ја преземе некоја европска земја или самите тие“.

Потоа, српскиот министер за финансии Синиша Мали на 20 октомври изјави дека „работата е многу едноставна“, дека руската и унгарската страна постигнале договор и дека договорот е потпишан.

Тој тогаш појасни дека за успешно завршување на купопродажбата останува уште една работа – согласност од телата за заштита на конкуренцијата во Србија и во други држави, меѓу кои и американската Канцеларија за контрола на странски средства (ОФАК), која функционира во рамките на Министерството за финансии на САД.

Од МОЛ тогаш ги демантираа и овие тврдења во изјава за Би-Би-Си.

„Нема нови елементи ниту напредок во преговорите поради кои би имале потреба да ги информираме финансиските пазари“, соопштија тогаш од компанијата.

Би можело да ве интересира

Лавров: И покрај длабоките политички разлики, подобро е да се разговара со САД

Русија: Нема да се согласиме на примирје, без да знаеме што следи потоа

Лавров: ЕУ се претвора во милитаристички блок насочен против Русија и Белорусија

Германскиот министер одби заедничка фотографија со Лавров, Москва реагира: „Се исплаши“

Mакедонски државјанин на автопатот кај Ниш возеше со 214 километри на час – плати казна од 850 евра

А1он

Москва до Вашингтон: „Ослободете го Мадуро“