Нарачателите на убиството на амбасадорот на Русија во Турција, Андреј Карлов нема да го поткопаат процесот за нормализација на односите меѓу двете земји, изјави рускиот министер за надворешни работи Сергеј Лавров, јави ТАСС.
Неговиот турски колега Мевљут Чавушоглу истакна дела целта на атентатот е да го спречи решавањето на конфликтот во Сирија.
– Турција и Русија сепак нема да го дозволат тоа, рече Чавушоглу, кој синоќа пристигна во Москва.
Турскиот министер за надворешни работи денеска ќе се сретне со Лавров. Средбата ќе се одржи пред преговорите во Москва за Сирија во формат Русија-Турција-Иран.
Рускиот премиер Дмитриј Медведев и турскиот премиер Бинали Јилдирим го осудија убиството на Андреј Карлов во телефонски разговор, соопшти руската Влада.
Јилдирим истакна дека организаторите на атентатот имале цел да го поткопаат нормализирањето на односите меѓу Русија и Турција и да ги искомплицираат заедничките напори за решавање на регионалните конфликти.
Медведев нагласи дека убиството предизвикало „вонредна ситуација во меѓународните односи“.