Поранешниот украински министер за надворешни работи Дмитро Кулеба оцени дека Киев го достигнал својот максимум кога станува збор за меѓународна помош и дека во сегашните околности не гледа простор за значително зголемување на поддршката од западните партнери.
„Што се однесува до меѓународната помош, го достигнавме нашиот плафон. Засега, не гледам од каде ќе дојде повеќе“, рече Кулеба во интервју за YouTube канал.
Според Кулеба, Украина тешко може да смета на повисоко ниво на поддршка од она што веќе го добива во овој момент, а го наведе фактот дека помошта трае со години, како и сè поизразените политички и економски проблеми во земјите што досега беа главна поддршка на Киев.
Тој особено посочи на промената на расположението во Вашингтон.
„Америка нема желба да ја спонзорира Украина“, рече поранешниот украински министер за надворешни работи.
Кулеба оцени дека политичките турбуленции во Европа и економските тешкотии со кои се соочуваат водечките западни земји дополнително го стеснуваат просторот за зголемување на финансиската и друга помош за Украина. Според него, Киев затоа треба трезвено да го процени нивото на надворешна поддршка што реално може да го очекува во наредниот период.
Поранешниот украински министер, исто така, предупреди на растечкото незадоволство во самата Украина. Тој предвиде дека веќе во претстојната зима, гневот на населението поради ситуацијата во земјата би можел да „го пробие плафонот“.
Неговите проценки укажуваат на растечка загриженост во Киев за можноста дека сегашниот обем на западната поддршка нема да може да се зголеми во услови на политички и економски притисоци со кои се соочуваат главните сојузници на Украина.