Кремљ денеска соопшти дека рускиот претседател Владимир Путин и американскиот претседател Доналд Трамп не планираат повторно да разговараат по телефон по посетата на инвестицискиот претставник на Путин на Вашингтон.
Ен-Би-Си Њуз претходно објави дека неговиот близок круг го советува Трамп да не разговара повторно со Путин додека рускиот лидер не се обврзе на целосен прекин на огнот во Украина, нешто на што Путин рече дека во принцип е отворен доколку се исполни долгата листа на услови.
Кирил Дмитриев, пратеникот на Путин за инвестициска соработка, вчера изјави дека гледа „позитивна динамика“ во односите меѓу Москва и Вашингтон по дводневните средби во Вашингтон, но рече дека се потребни повеќе средби за да се решат разликите.
„Без сомнение, забележуваме позитивна динамика во нашите односи“, изјави Дмитриев за новинарите во Вашингтон по средбата со претставници на администрацијата на претседателот Доналд Трамп, цитирани од руските новински агенции. „Сè уште ќе бидат неопходни низа состаноци за да се решат сите наши разлики. Но, главната работа е што гледаме позитивен, креативен став“, агенциите ја цитираат неговата изјава.
„Гледаме апсолутно јасно дека администрацијата на претседателот е решена да ги решава прашањата, за разлика од претседателот (Џо) Бајден. Тие пристапуваат со голема почит, поставуваат многу прашања, наоѓаат компромиси“, рече тој.
Дмитриев рече дека дел од темите на кои разговарале во Вашингтон биле соработката во производството на ретки минерали и Арктикот. Тој додаде дека продолжуваат преговорите за обновување на директните воздушни врски меѓу Русија и САД.