Стотици Кубанци учествуваа во првиот дозволен марш против хомофобијата во Куба, како и за давање права на хомосексуалците во оваа карибска земја.
Протестите се одржаа низ главните улици во центарот на Хавана. Учесниците на маршот ги предводеше Маријела Кастро, ќерка на кубанскиот лидер Раул Кастро и претседател на кубанскиот Центар за сексуално воспитување. Таа е и раководител на кампањата за хомосексуални права на луѓето во Куба.
Пред Раул Кастро (82) во 2008 година да го наследи својот болен брат, долгогодишниот кубански лидер Фидел Кастро, во Куба беа целосно забранети секакви протестни маршеви на активистите против хомофобијата на островот.
Учесниците на протестот формираа долга колона од танчери и свирачи на популарниот кубански инструмент конга, носејќи знамиња со боите на виножитото, традиционалното обележје на активистите за давање права на хомосексуалците. Во протестната колона се носеле и транспаренти на кои пишувало „Хомофобија- не, социјализам- да“.
Некои од учесниците во маршот, инаку хомосексуалци, изјавија дека последниве години на Куба е забележан „голем напредок“ околу третманот на хомосексуалноста.
Маријела Кастро пред учесниците на протестниот марш изјави дека верува оти на Куба „би можело да се дозволат и геј бракови“, а како причина за отпорот што сега постои, таа ги наведе „предрасудите на луѓето“.