Кинескиот премиер Ли Кечијанг утре ќе допатува во тридневна посета на Атина во чии рамки се очекува двете земји да ја потврдат својата посветеност за зајакнување на билатералните трговски врски, а би требало да бидат потпишани и неколку договори.
Ли, кој во Атина ќе биде придружуван од 14-члена владина делегација, во писмо објавено во „Катерини“ ја изразува својата намера да „отвори нови можности за подлабоки односи меѓу Кина и Грција“.
Опишувајќи ги грчката и кинеската економија како „взаемно комплементарни“, кинескиот премиер вели дека гледа „огромен потенцијал за соработка“.
– Грција ја забрзува приватизацијата и развојот на инфраструктурата. Кина ќе охрабри реномирани фирми да играат активна улога во овој процес, изјави Ли додавајќи дека тие ќе работат со Грција со цел пристаништето Пиреја да биде едно од најдобрите во Средоземното Море.
Кинескиот премиер исто така изрази интерес за аеродроми, железнички, патен и друг инфраструктурен развој, како и за поморски транспорт, логистика и бродоградба.