Белата куќа објави дека Кина сега се соочува со царина од 245 отсто за увоз во САД поради нејзините „одмазднички мерки“.
Оваа одлука означува натамошна ескалација на трговскиот конфликт меѓу двете најголеми светски економии.
Новата тарифна стапка, повисока од претходно објавената, беше наведена во информативен документ објавен од Белата куќа, пишува Newsweek. Одлуката доаѓа заедно со извршната наредба на претседателот Доналд Трамп за отпочнување истрага за ризиците за националната безбедност предизвикани од зависноста на САД од увоз на преработени критични минерали и нивни деривати.
На новинарско прашање за новата тарифна стапка, портпаролот на кинеското Министерство за надворешни работи, Лин Џиан, на прес-конференција во средата рече: „За точни информации за тарифите, ве молиме контактирајте со американската страна“, објави China News Network.
Тој додаде дека Кина смета дека трговската војна иницирана од САД е неоправдана и дека контрамерките на Кина се неопходни за заштита на легитимните права и интереси, како и за одржување на меѓународната правичност.
„Нема победници во трговските војни. Кина не сака конфликт, но не се плаши да ги брани своите права“, нагласи Лин.
Трамп претходно воведе царина од 10 отсто за увоз од сите земји, но привремено ги суспендираше дополнителните „реципрочни“ царини, различни за секоја земја во зависност од нивните трговски бариери, за да се овозможи преговори за нови трговски договори. Исклучок е Кина, која се соочува со се построги царини, на што возвраќа со слични мерки.