Шефот на Централната команда на САД (CENTCOM) изјави дека Иран „дејствува од очај“ со тоа што таргетира цивилни цели во војната.
Во интервју за сателитската мрежа Иран Интернешнл, адмиралот на американската морнарица Бред Купер изјави: „Тие дејствуваат од очај. Во последните неколку недели тие намерно нападнаа цивилни цели повеќе од 300 пати“.
Во своето прво интервју еден на еден од почетокот на војната, Купер рече дека континуираните напади на Иран врз арапските земји од Заливот и поширокиот Блиски Исток ги ставаат цивилите во опасност.
Купер, исто така, истакна дека иранското пукање врз цели низ Блискиот Исток се забавило додека војната влегува во четвртата недела.
– На почетокот на конфликтот видовте голем број, десетици беспилотни летала и ракети. Тоа веќе го нема, рече адмиралот Купер.
Тој додаде дека САД и Израел ги таргетираат локациите за производство на ракети и беспилотни летала.
„Ние, исто така, го таргетираме самото производство. Значи, не станува збор само за заканата денес. Ние, исто така, ја отстрануваме заканата од иднината, кога станува збор за беспилотни летала и ракети, како и за морнарицата“, истакна тој.
Купер, исто така, рече дека сè уште не е време иранската јавност да излезе на улиците, иако и Израел и САД изјавија дека се надеваат дека иранската јавност ќе го собори теократскиот режим на земјата како резултат на тоа.
„Тие лансираат ракети и беспилотни летала од населени места и засега мора да останете внатре. Во одреден момент ќе има јасен сигнал, како што посочи претседателот, дека можете да излезете, објави Купер.
Тој, исто така, изјави дека водечките луѓе на иранската армија се „во длабоки бункери“, додека војниците на фронтовската линија сè уште се изложени на американски и израелски воздушни напади.
„Би сакал сите да забележат, го следев ова последната недела, овој извонреден контраст помеѓу удобноста и заштитата што ја имаат високите генерали на Исламската Република, барем оние кои се уште се живи, кои се во длабоки бункери и објекти во и околу Техеран. Споредете го тоа со војниците долу на терен кои не се заштитени. Генералите се заштитени. Војниците не се“, рече тој.