Претседателот на Кина Сји Џинпинг повика на формирање нова азиска организација за соработка во сферата на безбедноста, во чија основа ќе биде регионална група држави, меѓу кои и Русија и Иран, пренесува БТА.
Оваа изјава тој ја упати од Шангај, на четвртата средба на Конференцијата за интеракција и мерки на доверба меѓу азиските земји, чие влијание Пекинг се обидува да го зајакне како противтежа на влијанието на САД. Форумот е формиран во 1992 година, по иницијатива на Казахстан и досега организираше главно дискусии. Меѓу останатите членки се Израел, Монголија, Узбекистан, Јужна Кореја, Тајланд и Турција, а вчера бројката се зголеми на 26 земји-членки, по придружувањето на Бангладеш и Катар.
Меѓу учесниците на конференцијата е и рускиот претседател Владимир Путин, кој од вчера е во посета на Кина, претседателот на Иран Хасан Рохани и генералниот секретар на ОН Бан Ки-мун.
Кинескиот претседател посочи дека новата азиска безбедносна структура ќе се стреми кон воспоставување механизми за уредување на територијални спорови по пат на преговори и потенцираше дека поддржувањето на стабилноста ќе и овозможи на Азија да добие поважна улога во „воспоставувањето мултиполарен свет и демократија во меѓународните односи“, одбележува ДПА.
– Кина се стреми кон создавање на постојани механизми за размена на информации со земјите од регионот, насочени кон борба против тероризмот, сепаратизмот и екстремизмот, рече кинескиот претседател.