САД ќе примат уште 15.000 бегалци од целиот свет следната година, со што нивниот број ќе се зголеми на 85.000, како и на 100.000 во 2017 година, изјави денеска американскиот државен секретар Џон Кери по средбата со германскиот министер за надворешни работи Франк-Валтер Штајнмајер во Берлин.
Кери не објави колку ќе бидат бегалци од Сирија, но ја истакна подготвеноста на САД да помогнат.
– Во консултација со Конгресот, ќе продолжиме со барање начини за зголемување на оваа бројка, истовремено одржувајќи цврста безбедност, истакна Кери.
Најавата на Кери доаѓа пред вонредниот самит на лидерите на ЕУ на 23 септември, на кој ќе се разговара за начините за решавање на бегалската криза.