Американскиот државен секретар Џон Кери изрази надеж дека наскоро ќе бидат обновени израелско-палестинските мировни преговори, јави ДПА.
– Двете страни во конфликтот ја намалија големата бездна меѓу нив по спорните прашања, истакна синоќа Кери во Аман на заедничка прес-конференција со јорданскиот министер за надворешни работи Насер Џудe.
Тој го поздрави надредокот постигнат изминатите три месеци на „тивката дипломатија“ меѓу Израел и Палестинците со цел да се пронајде решение за еден од најтешките конфликти во современата историја.
Кери ја поддржа арапската мировна иницијатива, односно предлогот на повеќе од 50 арапски и други муслимански држави да го признаат Израел и да воспостават дипломатски односи со него, во замена за создавање на палестинската држава во границите oд 1967 година. Тој го повика Израел сериозно да ја разгледа оваа можност.
Кери се сретна и со јорданскиот крал Абдула, со кого исто така разговараше за можноста за обновување на израелско-палестинскиот мировен процес.
Претходно вчера тој имаше разговори и со претставници на Арапската лига. Ова е шестата посета на Кери на Блискиот Исток, откако во февруари дојде на оваа функција и втора за помалку од еден месец.