Владата на североисточниот шпански регион Каталонија ќе одлучи до 15 октомври дали ќе се одржи референдум за отцепување од Шпанија.
Каталонија, каде живеат 7,5 милиони жители, која има сопствен јазик и учествува со околу една петтина од бруто домашниот производ на Шпанија, одамна се стреми кон независност. Сепак, централната власт го прогласи референдумот, кој е закажан за 9 ноември, за нелегитимен, а Уставниот суд го забраниi неговото организирање се додека не се произнесе за неговата законитост, што може да трае повеќе месеци или години.
Каталонскиот премиер, Артур Мас се наоѓа под притисок од страна на порадикални застапници за независноста да им се спротивстави на Мадрид и Уставниот суд и да продолжи со подготовката на референдумот.
Во саботата Владата на Каталонија објави соопштение дека одлучила „да преземе законска, политичка и институционална иницијатива да го гарантира правото на одлука за политичката иднина на Каталонија“.