Десничарските партии во Норвешка сакаат да го сменат поранешниот норвешки социјалдемократски премиер Торбјорн Јагланд кој моментно ја извршува функцијата претседател на норвешкиот Нобелов комитет, јави дописникот на МИА од Гетеборг.
Еден од кандидатите кој би можел да биде назначен на таа функција е шефот на шведската дипломатија Карл Билд, кој исто така е поранешен премиер и член на владејачката шведска конзервативна партија на Модератите.
– Ќе предложам да избереме меѓу Кофи Анан, Хилари Клинтон, Карл Билд или Јан Петерсен, вели Линда Хофстад Хелеланд, член на норвешката Десничарска партија. Норвешкиот Нобелов комитет, кој ја доделува Нобеловата награда за мир, го назначува норвешкиот Парламент. Смена на претседателската функција се очекува да се случи наесен, пишува норвешкиот весник „Верденс ганг“.