Канада ја разгледува со партнерите од НАТО можноста за свое постојано воено присуство во Источна Европа, изјави премиерот Стивен Харпер.
– Сега водиме дијалог со Полска и со други земји за тоа што, како сојузници од Алијансата, можеме да сториме ние за обезбедување на мирот во регионот. Го разгледуваме тоа прашање сега, и веројатно ќе го разгледаме во септември на средбата на врвот на НАТО во Велс, рече канадскиот премиер.
Во Полска во моментот се наоѓаат 125 канадски војници кои од денеска до 21 јуни ќе учествуваат на вежби на Алијансата на територијата на таа земја и на трите балтички републики.
Канада освен тоа распореди еден воен брод во Средоземното Море и шест ловци Ф-18 во Романија.