Кампањата „Правда за Украина“ што почна во Велика Британија објави нацрт-обвинение против рускиот претседател Владимир Путин за кривично дело агресија врз Украина, а е составено од експерти од англосаксонското право.
Обвинението, составено од Рајан Гудман, професор по право на Универзитетот во Њујорк и Ребека Хамилтон, вонреден професор по право на Правниот факултет на Универзитетот во Вашингтон, служи како „примерно кривично обвинение“ против рускиот претседател за злосторството „почнување и спорведување на агресивна војна“, со инвазијата врз Украина.
Поддржувачите на кампањата, вклучувајќи го и поранешниот премиер Гордон Браун, веруваат дека судот за кривичното дело агресија може да обезбеди брз пат до правдата за украинскиот народ.
Браун кажа дека, по ужасите во Буча, Бурза и Киев, и загриженоста на светските лидери, вклучувајќи го и американскиот претседател Џо Бајден, кои мислат дека е извршен геноцид, важно е поттикнувачот на војната да се изведе пред лицето на правдата што е можно поскоро.
Кампањата за петиција за формирање на судот има повеќе од 1,75 милиони потписи.
-Денеска го објавуваме текстот на кривичното обвинение против претседателот Владимир Путин за иницирање и спроведување на руската агресивна војна, рече Браун.
„Нашето обвинение ја покажува природата и тежината на случаите што обвинителите за воени злосторства би можеле да ги следат пред меѓународен трибунал. Новите злосторства пријавени оваа недела ја направија меѓународната акција против него поитна и поважна“, додаде тој.
„Време е нашата порака дека нема да стоиме настрана, туку ќе се обединиме и ќе го прогонуваме Путин ширум светот, да стигне до неговиот поблизок круг, кој мора да биде предупреден дека тие се предмет на казна за злосторствата во кои учествувале“, се наведува од кампањата „Правда за Украина“.
Извор: МИА