Откако Фејсбук и Инстаграм вчера му ги деактивираа профилите на чеченскиот претседател Рамзан Кадиров, тој најави дека нема да бара реактивирање и за целиот случај ги обвини САД.
Тоа е прва реакција на Кадиров, кого минатата недела американското Министерство за финансии го додаде на т.н. „листа Магнитски“, обвинувајќи го за тoртура и убиства и за „чистки“ на хомосексуалците и бисексуалците во Чеченија и во севернокавкаскиот регион.
Тој е еден од четирите руски државјани кои се најдоа на дополнетата „листа Магнитски“, изработена врз основа на Законот за заштита на човековите права во Русија и поранешните советски републики, познат како „Акт Магнитски“.
Профилите на Кадиров на Фејсбук и Инстраграм, кои имаат илјадници следбеници, од завчера се недостапни. На овие профоли тој често објавуваше фотографии, прикажувајќи го својот екстравагентен стил на живот.
– Социјалните мрежи можат да блокираат профили, но името на Рамзан Кадиров никогаш нема да биде блокирано, нити од нив, ниту од нивните домаќини, порача чеченскиот претседател.